Comezamos!

As reformas feitas este verán no colexio conseguiron que agora semelle algo máis que un colexio con 80 anos de antigüidade. Foron levadas a cabo maiormente pola Concellería de Educación de Sada con cargo ó Fondo Estatal de Inversión Local (FEIL) e, en menor medida, pola Delegación Provincial de Educación. Consistiron no pintado interior e exterior do centro, arranxo de portas, renovación do valado perimetral do centro, impermeabilización do tellado, entarimado de chan na aulas de 3º de infantil, biblioteca e “laboratorio”, adecentamento das aulas de 1º e 2º de infantil mediante o illamento do tellado e cambio de tazas de váter por unhas de tamaño axeitado ós nenos. Agradecemos o traballo, que moita falta facía. E lembramos que aínda quedan cousas importantes por facer: a renovación do tellado, obra comprometida pola Consellería de Educación para levar a cabo este verán e que queda “para o ano que ven”; o arranxo da parte principal do muro exterior e da porta de entrada; a reparación dalgunha zona do patio; etc. son obras necesarias que urxen levar a cabo. Nembargante non podemos esquecer que todo isto, como dirían as nosas avoas, son remendos. O verdadeiro arranxo que necesita este colexio, e que nós esperamos ver moi pronto, a verdadeira e prometida solución ás nosas necesidades é a construción dun novo edificio. AMPLIACIÓN XA!!!

Cando escribimos estas liñas, aínda estamos pendentes de que a Xunta de Galicia renove o convenio para poder continuar servizo de comedor escolar, como se viña facendo no curso pasado. É incrible cunha administración pública paralice algo tan esencial para a conciliación familiar como o servizo de comedor. No pasado mes de abril, a Dirección do Colexio, o Concello de Sada e nós, a ANPA, iniciamos os trámites para a renovación do convenio do comedor. Tan só faltaba a redacción do texto do convenio, tarefa que lle pertence á Xunta (Consellería de Educación). Nas diferentes conversas que tivemos con eles non daban lugar a dúbida: “non hai problema” dicían. . Pero o pasado mércores pola mañá, menos de 24 horas antes do comezo do curso, comunícannos telefonicamente que “o convenio do comedor caducou e hai que facer un novo”. Que queren? A qué xogan? Acaso isto e un xogo? Tanto a ANPA e desde a dirección do colexio, estamos a nos mobilizar para que este atranco teña fin o antes posible.

Saúdos e benvidos. Comezamos.